વિફલતાનો વિજય / જયેન્દ્ર શેખડીવાળા

8 - વિફલતાનો વિજય / જયેન્દ્ર શેખડીવાળા

રક્તમાં કારણ સમયનું સળવળે

શબ્દનું પાતાળ આખું ખળભળે

એક ક્ષણને ઓળખીયે ના શકું

કે સ્વજન જેવાં વરસ આવી મળે

આ ઉદાસીના બધા અર્થો સતત

લ્યો, તમારા નામમાં જઇને ભળે

સામટાં ફૂલો ખરે છે આંખથી

ક્યાંક મારા સ્વપ્નની મોસમ ઢળે

જિંદગી સૂરજમુખીનું ફૂલ છે -

લાગણીયે સાંજની માફક છળે

આ નગર તો છે વિફલતાનો વિજય 

પાનખર પ્હેરીને માણસ ઝળહળે