મોક્ષ નામક વાસના / જયેન્દ્ર શેખડીવાળા

28 - મોક્ષ નામક વાસના / જયેન્દ્ર શેખડીવાળા

લાગણી ઝાકળ રૂપે અહીંયા મળે

કોઇ કહે છે કે નિશાચરને થીજેલું જળ છળે

રે, સમજના એકચક્રી રાજ્યમાં -

આપણા વિસ્મયનું બાળક ક્યારનુંયે ટળવળે

શબ્દને ચહેરો કે પડછાયો નથી 

મોક્ષ નામક વાસના લૈ અર્થ વાંસામાં બળે

હું વિધિવશ છું સમય માટીપગો

કાર્ય-કારણનું પગેરું આમ તો દરિયે મળે

લ્યો, કમળ જેવી કવિતાની કડી

કે અચિંતાનું હ્રદયમાંથી સરોવર નીકળે.